195 соёолон бүртгүүлжээ

Тулгар төрийн 2234 жил, Их Монгол Улсын 819 жил, Үндэсний эрх чөлөө, тусгаар тогтнолоо сэргээн мандуулсны 114, Ардын хувьсгалын 104 жилийн ой, Үндэсний их баяр цэнгэл наадмын хурдан морины уралдаан гурав дахь өдрөө Хүйн долоон худагийн торгон ногоон дэнжид соёолон морьдын уралдаанаар үргэлжилж байна. 

Хүйн долоон худагийн дэнж хэдийн наадамчин олны хөлд дарагджээ. Жил жилийн хамгийн олон үзэгчтэй уралдаан бол соёолонгийн уралдаан байдаг билээ. Тоосонд нь ороход бүтэн жилийн хийморь сэргэдэг гэгддэг соёолон насны морьдын уралдаанд Монгол орны дөрвөн зүг, найман зовхисоос ирсэн 195 хурдан буян бүртгүүлж, гарааны зурхай руу мордох гэж байна. 
Тэдгээрээс онцлон дурдвал Дундговь аймгийн Эрдэнэдалай сумын уугуул аймгийн алдарт уяач Батсуурийн Чинзоригийн хээр, Орхон аймгийн Баян-Өндөр сумын уугуул Монгол улсын алдарт уяач Цэдэндамбын Эрдэнэбаярын хүрэн, Өмнөговь аймгийн Цогтцэций сумын уугуул аймгийн алдарт уяач Чойжилын Батжаргалын буянт хүрэн, Говь-Алтай аймгийн алдарт уяач Бэгзсүрэнгийн Гантулгын хээр, Сүхбаатар аймгийн Баяндэлгэр сумын уяач Бямбажавын Баярмагнайн бор, Баянхонгор аймгийн Бууцагаан сумын уугуул Монгол улсын манлай уяач Биндэръяагийн  Батсанаагийн халтар, Дундговь аймгийн Луус сумын уугуул аймгийн алдарт уяач Чүлтэмийн Цогтбаярын халиун, Цэндсүрэнгийн Өнөбатын бор, Нийслэлийн алдарт уяач Жуковын Сүхбаатарын халтар, Хөвсгөл аймгийн алдарт уяач Очирын Баатарын хонгор, Рашаант сумын уугуул аймгийн Алдарт уяач Цэрэндоржийн Амарсанаагийн халтар, Увс аймгийн Тэс сумын уяач Мятавын Хүрэлбаатарын хүрэн халзан, Цагаанхайрхан сумын алдарт уяач Ядамсүрэн Доржчангын 100 шар, Төв аймгийн Баянцагаан сумын уяач Баярмагнайн Чинбатын бор, Дорнод аймгийн Хөлөнбуйр сумын уугуул аймгийн алдарт уяач Ганхуягийн Бүдхангайн номин цэнхэр,  Сүхбаатар аймгийн Онгон сумын уяач Баасандоржийн Дашнямын хээр, Ховд аймгийн Мөст сумын алдарт уяач Пэжээгийн Даваанямын хээр, Бямбацэрэнгийн Ганбаатарын цахиур хул, Өвөрхангай аймгийн Хайрхандулаан сумын уугуул Монгол улсны Тод манлай уяач Эрдэнэбатын Эрдэнэчулууны хүрэн, Завхан аймгийн Яруу сумын уугуул Монгол улсын Тод манлай уяач Дашзэвэгийн Дагвадоржийн наран халиун, Увс аймгийн Зүүнхангай сумын уугуул Монгол улсын алдарт уяач Хүрэлийн Барсүрэнгийн бүтэн хээр, Булган аймгийн Сэлэнгэ сумын уугуул аймгийн алдарт уяач Цэнд-Аюушийн Батбаярын бүлтэн зээрд зэрэг улс, бүсийн уралдааны айраг, түрүүний эзэн олон цуутай хүлэг мордож байна. 

Хурдан соёолонгууд 22 километр зайд уралдана.

А.Эрдэнэчимэг